सुर्खेत। कर्णाली प्रदेशका मुख्यमन्त्री जीवनबहादुर शाहीले आफ्नो सम्पत्ति विवरण सार्वजनिक गरेका छन्। मुख्यमन्त्री तथा मन्त्रिपरिषद्को कार्यालयले आफ्नो वेबसाइट मार्फत सार्वजनिक गरेको सम्पत्ति विवरणमा मुख्यमन्त्री शाहीसँग विभिन्न बैंक तथा वित्तिय संस्थाहरूमा १ करोड २० लाख नगद रहेको उल्लेख छ। मुख्यमन्त्री भएको करिब चार महिनापछि सार्वजनिक गरिएको सम्पत्ति विवरण अनुसार ५६ तोला सुन, २ किलो चाँदी, ९५ लाखको कार र ठाउँठाउँमा जग्गा रहेको उल्लेख गरिएको छ ।
मुख्यमन्त्री शाहीको हुम्लाको सिमकोट ६ मा ३७३ कित्ता नम्बर र ७२३.७५ क्षेत्रफल वर्गमिटर, काठमाडौं महानगरपालिका १६ मा १६३ कित्ता नम्बर र ३३०.७५ वर्गमिटर क्षेत्रफल, श्रीमती वसन्ती शाहीको नाममा हुम्लाको सिमकोट ६ मा १८१ कित्ता नम्बर र ५४८.२५ वर्गमिटर क्षेत्रफलमा ३ वटा घर रहेका छन्। यसैगरी हुम्लामा २ सय रोपनी, बाँकेको खजुरामा २ बिघा, बाँकेकै नेपालगञ्जमा घडेरी र काठमाडौंको चन्द्रागिरीमा श्रीमती बसन्ती शाहीको नाममा जग्गा रहेको छ।
यो सम्पत्ति सबै पुर्ख्यौली तथा जागिर र व्यापार, व्यवसायबाट खरिद गरेको उल्लेख गरेका छन्। चौँरी, जुमा, गाई, गोरु गरेर १२ वटा, घोडा दुई वटा र भेडाबाख्रा ५० वटा रहेको र सबै आफ्नै घरमा पालेको सम्पत्ति विवरणमा उल्लेख गरेका छन्।
मुख्यमन्त्री शाहीले आफ्नो कुल १ करोड ७२ लाख ऋण रहेको पनि उल्लेख गरेका छन्।
